അളവറ്റ ദയ

രണ്ട് സുഹൃത്തുക്കൾ ഒരു ഇലക്ട്രോണിക്സ് സ്റ്റോറിൽ ലാപ്ടോപ്പ് മേടിക്കാനായി നോക്കിക്കൊണ്ടിരിക്കുമ്പോൾ ബാസ്ക്കറ്റ്ബോൾ ഇതിഹാസം ഷക്വീൽ ഒനീലിനെ കണ്ടുമുട്ടി. അടുത്തിടെ ഒനീലിന് തന്റെ സഹോദരിയേയും ഒരു മുൻ സഹതാരത്തേയും നഷ്ടപ്പെട്ടുവെന്ന് അറിയാവുന്നതുകൊണ്ട്, അവർ തങ്ങളുടെ അനുശോചനം രേഖപ്പെടുത്തി. രണ്ടുപേരും തങ്ങളുടെ ഷോപ്പിംഗിലേക്കു മടങ്ങിയെത്തിയപ്പോൾ, ഷാക്ക് അവരെ സമീപിച്ച് അവിടെയുള്ളതിൽവച്ച് ഏറ്റവും നല്ല ലാപ്ടോപ്പ് തിരഞ്ഞെടുക്കാൻ അവരോടു പറഞ്ഞു. പ്രയാസകരമായ ഒരു സമയത്തിലൂടെ കടന്നുപോകുന്ന ഒരു വ്യക്തിയായി അദ്ദേഹത്തെ അവർ കണ്ടതുകൊണ്ട്, അവരുടെ ദയപൂർവ്വമായ പ്രവൃത്തിയിൽ സന്തുഷ്ടനായി അദ്ദേഹം അവർക്കായി അത് വാങ്ങിനൽകി.

“ദയാലുവായവൻ സ്വന്തപ്രാണന്നു നന്മ ചെയ്യുന്നു” (സദൃശവാക്യങ്ങൾ 11:17) എന്നു സഹസ്രാബ്ദങ്ങൾക്ക് മുമ്പ്, ശലോമോൻ എഴുതി. മറ്റുള്ളവരുടെ ആവശ്യങ്ങൾ പരിഗണിച്ചുകൊണ്ടു അവരെ സഹായിക്കാനും ധൈര്യപ്പെടുത്താനും നമ്മളാൽ കഴിയുന്നത് ചെയ്യുമ്പോൾ, നമുക്കു പ്രതിഫലം ലഭിക്കുന്നു. ഇത് ഒരു ലാപ്ടോപ്പോ മറ്റു ഭൗതിക വസ്തുക്കളോ ആയിരിക്കണമെന്നില്ല, പക്ഷേ ഈ ലോകത്തിന് അളക്കാൻ കഴിയാത്തവിധം നമ്മെ അനുഗ്രഹിക്കാനുള്ള മാർഗ്ഗങ്ങൾ ദൈവത്തിന്റെ പക്കലുണ്ട്. അതേ അധ്യായത്തിൽ ഒരു വാക്യം മുമ്പ് ശലോമോൻ വിശദീകരിച്ചതുപോലെ, “ലാവണ്യമുള്ള സ്ത്രീ മാനം രക്ഷിക്കുന്നു; വിക്രമന്മാർ സമ്പത്തു സൂക്ഷിക്കുന്നു” (വാ. 16). പണത്തേക്കാൾ വിലമതിക്കുന്ന, ദൈവത്തിൽ നിന്നുള്ള ദാനങ്ങളുണ്ട്. അവൻ തന്റെ തികഞ്ഞ ജ്ഞാനത്തിലും വഴിയിലും ഉദാരമായി അവയെ അളക്കുന്നു.

ദയയും ഉദാരതയും ദൈവത്തിന്റെ സ്വഭാവത്തിന്റെ ഭാഗമാണ്. അവ നമ്മുടെ സ്വന്തം ഹൃദയങ്ങളിലും ജീവിതത്തിലും പ്രകടിപ്പിച്ചു കാണാൻ അവൻ താല്പര്യപ്പെടുന്നു. ശലോമോൻ ഈ കാര്യം നന്നായി സംഗ്രഹിച്ചു: “തണുപ്പിക്കുന്നവന്നു തണുപ്പു കിട്ടും” (വാ. 25).

ഒരു പിടി അരി

വടക്കുകിഴക്കൻ ഇന്ത്യയിലെ മിസോറാം എന്ന സംസ്ഥാനം ദാരിദ്ര്യത്തിൽ നിന്ന് പതുക്കെ കരകയറിക്കൊണ്ടിരിക്കുകയാണ്. വരുമാനമില്ലെങ്കിലും, ഈ പ്രദേശത്ത് സുവിശേഷം ആദ്യമായി വന്നതുമുതൽ, യേശുവിൽ വിശ്വസിക്കുന്നവർ “പിടി അരി” എന്ന് വിളിക്കപ്പെടുന്ന ഒരു പ്രാദേശിക പാരമ്പര്യം ആചരിച്ചുവരുന്നു. ദിവസേന ഭക്ഷണം പാചകം ചെയ്യുമ്പോൾ ഒരുപിടി വേവിക്കാത്ത അരി മാറ്റിവെച്ച് സഭയിൽ കൊടുക്കും. ലോക നിലവാരം അനുസരിച്ചു ദരിദ്രമായ മിസോറാം സഭകൾ ദശലക്ഷക്കണക്കിനു പണം മിഷനുകൾക്കു നൽകുകയും ലോകമെമ്പാടും മിഷനറിമാരെ അയയ്ക്കുകയും ചെയ്തു. അവരുടെ സ്വന്തം നാട്ടിലെ പലരും ക്രിസ്തുവിലേക്ക് വന്നുചേർന്നിട്ടുമുണ്ട്.

2 കൊരിന്ത്യർ 8-ൽ പൗലൊസ് സമാനമായ വെല്ലുവിളി നേരിടുന്ന ഒരു സഭയെക്കുറിച്ചു വിവരിക്കുന്നുണ്ട്. മക്കെദോന്യയിലെ വിശ്വാസികൾ ദരിദ്രരായിരുന്നു, പക്ഷേ സന്തോഷത്തോടെയും സമൃദ്ധമായും നൽകുന്നതിൽ നിന്ന് അത് അവരെ തടഞ്ഞില്ല (വാ. 1-2). കൊടുക്കുന്നത് തങ്ങളുടെ ഒരു പദവിയായി കണ്ടുകൊണ്ടു അവർ പൗലൊസുമായി സഹകരിക്കാൻ “പ്രാപ്തിക്കു മീതെ” (വാ. 3) നൽകി. തങ്ങൾ ദൈവത്തിന്റെ വിഭവങ്ങളുടെ കാര്യസ്ഥർ മാത്രമാണെന്ന് അവർ മനസ്സിലാക്കി. തങ്ങളുടെ എല്ലാ ആവശ്യങ്ങളും അറിഞ്ഞു നൽകുന്ന ദൈവത്തിൽ അവർക്കുള്ള ആശ്രയം കാണിക്കാനുള്ള ഒരു ഉപാധിയായിരുന്നു അവരെ സംബന്ധിച്ചു കൊടുക്കൽ.

കൊടുക്കുന്നതിനോട് സമാനമായ സമീപനം പുലർത്താൻ കൊരിന്ത്യരെ പ്രോത്സാഹിപ്പിക്കാൻ പൗലൊസ് മക്കെദോന്യക്കാരെ ഉപയോഗിച്ചു. “വിശ്വാസം, വചനം, പരിജ്ഞാനം, പൂർണ്ണജാഗ്രത, ഞങ്ങളോടുള്ള സ്നേഹം ഇങ്ങനെ എല്ലാറ്റിലും” കൊരിന്ത്യക്കാർ മികവ് പുലർത്തി. ഇനി അവർ “ധർമ്മകാര്യത്തിലും മുന്തി”വരേണ്ടതുണ്ട് (വാ. 7).

മക്കെദോന്യക്കാരെയും മിസോറാമിലെ വിശ്വാസികളെയും പോലെ, ഉള്ളതിൽ നിന്ന് ഉദാരമായി നൽകിക്കൊണ്ട് നമ്മുടെ പിതാവിന്റെ ഔദാര്യം നമുക്കും പ്രതിഫലിപ്പിക്കാൻ കഴിയും.

നമ്മുടെ ശത്രുവിനെ സ്നേഹിക്കുക

രണ്ടാം ലോകമഹായുദ്ധ കാലത്ത് ശത്രുവിന്റെ നിയന്ത്രണത്തിലുള്ള ദ്വീപുകൾ ആക്രമിക്കുന്ന വേളയിൽ, യുഎസ് നാവികസേനയുടെ മെഡിക്കൽ കോർപ്സ്മാൻ ലിൻ വെസ്റ്റൺ നാവികരോടൊപ്പം കരയിലേക്ക് ചെന്നു. അവർ അവിടെ ഭയാനകമായ നാശനഷ്ടങ്ങൾ കാണുവാനിടയായി. മുറിവേറ്റ പോടയാളികളെ മരുന്നുവച്ചുകെട്ടി അവിടെനിന്നു ഒഴിപ്പിക്കാൻ അദ്ദേഹം പരമാവധി ശ്രമിച്ചു. ഒരു അവസരത്തിൽ, വയറിൽ മാരകമായ മുറിവേറ്റ ഒരു ശത്രു സൈനികനെ അവരുടെ യൂണിറ്റ് കണ്ടെത്തി. പരിക്കിന്റെ സ്വഭാവം കാരണം, ആ മനുഷ്യനു വെള്ളം നൽകാൻ കഴിഞ്ഞില്ല. അയാളുടെ ജീവൻ നിലനിർത്താനായി പെറ്റി ഓഫീസർ വെസ്റ്റൺ ഇൻട്രാവനസ് പ്ലാസ്മ അയാൾക്കു നൽകി.

“നമ്മുടെ കൂട്ടർക്കായി ആ പ്ലാസ്മ മാറ്റിവയ്ക്കൂ!” നാവികരിൽ ഒരാൾ അലറി. പെറ്റി ഓഫീസർ വെസ്റ്റൺ അവന്റെ വാക്കുകൾ അവഗണിച്ചു. യേശു എന്തുചെയ്യുമെന്ന് അവനറിയാമായിരുന്നു: “നിങ്ങളുടെ ശത്രുക്കളെ സ്നേഹിപ്പിൻ” (മത്തായി 5:44).

വെല്ലുവിളി നിറഞ്ഞ ആ വാക്കുകൾ സംസാരിക്കുക മാത്രമല്ല യേശു ചെയ്തത്; അവൻ അത് ജീവിച്ചുകാണിച്ചു. വിരോധികളായ ഒരു ജനക്കൂട്ടം അവനെ പിടികൂടി മഹാപുരോഹിതന്റെ അടുക്കലേക്ക് കൊണ്ടുപോയപ്പോൾ, “യേശുവിനെ പിടിച്ചവർ അവനെ പരിഹസിച്ചു കണ്ണുകെട്ടി തല്ലി” (ലൂക്കൊസ് 22:63). ഈ ഉപദ്രവം അവന്റെ വ്യാജ വിചാരണകളിലൂടെയും വധശിക്ഷയിലൂടെയും തുടർന്നു. യേശു അത് സഹിക്കുക മാത്രമല്ല ചെയ്തത്. റോമൻ പടയാളികൾ അവനെ ക്രൂശിച്ചപ്പോൾ, അവരോടു ക്ഷമിക്കാനായി അവൻ പ്രാർത്ഥിക്കുകകൂടി ചെയ്തു (23:34).

നമ്മെ കൊല്ലാൻ ശ്രമിക്കുന്ന ഒരു അക്ഷരീക ശത്രുവിനെ നാം അഭിമുഖീകരിക്കണമെന്നില്ല. എന്നാൽ നിന്ദയും പരിഹാസവും സഹിക്കേണ്ടി വരുന്നത് എങ്ങനെയാണെന്ന് എല്ലാവർക്കും അറിയാം. ദേഷ്യത്തിൽ പ്രതികരിക്കുക എന്നതാണ് നമ്മുടെ സ്വാഭാവിക പ്രതികരണം. യേശു ആ മാനദണ്ഡം ഉയർത്തി: “നിങ്ങളെ ഉപദ്രവിക്കുന്നവർക്കു വേണ്ടി പ്രാർത്ഥിപ്പിൻ” (മത്തായി 5:44) എന്നാക്കി.

യേശു ചെയ്തതുപോലെ നമ്മുടെ ശത്രുക്കളോടു പോലും ദയ കാണിച്ചുകൊണ്ടു, നമുക്കിന്ന് അത്തരം സ്നേഹത്തിൽ നടക്കാം.

ദൈവം നിങ്ങളെ കാണുന്നു

“താഴെ ഇറങ്ങിക്കേ!” പ്രസംഗപീഠത്തിൽ കയറി കൈകൾ വീശിക്കാണിക്കുന്ന തന്റെ മകനോട് എന്റെ സുഹൃത്ത് ഉച്ചത്തിൽ പറഞ്ഞു. “പാസ്റ്റർ എന്നെ കാണണം,” അവൻ നിഷ്കളങ്കമായി മറുപടി പറഞ്ഞു. “ഞാൻ ഇവിടെ കയറി നിന്നില്ലെങ്കിൽ പാസ്റ്റർ എന്നെ കാണില്ല.”

മിക്ക സഭകളിലും പീഠങ്ങളിൽ കയറി നിൽക്കുന്നത് പ്രോത്സാഹിപ്പിക്കാറില്ലെങ്കിലും എന്റെ സുഹൃത്തിന്റെ മകൻ പറഞ്ഞതിൽ കാര്യമുണ്ടായിരുന്നു. അവിടെ കയറി നിന്നുകൊണ്ടു കൈകൾ വീശികാണിക്കുന്നത് തീർച്ചയായും പാസ്റ്ററുടെ ശ്രദ്ധ ആകർഷിക്കാനുമുള്ള ഒരു നല്ല മാർഗമായിരുന്നു.

നാം ദൈവത്തിന്റെ ശ്രദ്ധ ആകർഷിക്കാൻ ശ്രമിക്കുമ്പോൾ, അവൻ നമ്മെ കാണുമോ എന്നതിനെക്കുറിച്ച് നാം വിഷമിക്കേണ്ടതില്ല. ദൈവം നമ്മെ ഓരോരുത്തരെയും എല്ലായ്പ്പോഴും കാണുന്നു. തന്റെ ജീവിതത്തിലെ ഏറ്റവും താഴ്ന്ന, ഏകാന്തമായ, ഏറ്റവും നിരാശാജനകമായ സമയത്തായിരുന്നപ്പോൾ ഹാഗാറിനു തന്നെത്തന്നെ വെളിപ്പെടുത്തിയതും അവൻ തന്നെയാണ്. അവളെ ഒരു ഉപഭോഗ വസ്തുവായി ഉപയോഗിച്ചുകൊണ്ട്, അബ്രാമിന് ഒരു മകനെ ജനിപ്പിക്കാനായി ഭാര്യ സാറായി നൽകി (ഉല്പത്തി 16:3). അവൾ ഗർഭിണിയായപ്പോൾ, ഹാഗാറിനോടു മോശമായി പെരുമാറാൻ അബ്രാം തന്റെ ഭാര്യയെ അനുവദിച്ചു: “സാറായി അവളോടു കാഠിന്യം തുടങ്ങിയപ്പോൾ അവൾ അവളെ വിട്ടു ഓടിപ്പോയി” (വാക്യം 6). 

ഓടിപ്പോയ ആ അടിമ ഗർഭിണിയും ഏകാകിനിയും നിരാശിതയുമായിരുന്നു. എന്നിട്ടും മരുഭൂമിയിലെ അവളുടെ നിരാശയുടെ നടുവിൽ, കാരുണ്യത്തോടെ ദൈവം അവളോട് സംസാരിക്കാനായി ഒരു ദൂതനെ അയച്ചു. ദൂതൻ അവളോട് പറഞ്ഞു, ദൈവം “നിന്റെ സങ്കടം” കേട്ടു (വാക്യം 11). “ദൈവമേ, നീ എന്നെ കാണുന്നു” (വാക്യം 13) എന്നു അവൾ മറുപടി പറഞ്ഞു.

എന്തൊരു തിരിച്ചറിവ്-പ്രത്യേകിച്ച് മരുഭൂമിയുടെ നടുവിൽ. ദൈവം ഹാഗാറിനെ കണ്ടു മനസ്സലിഞ്ഞു. എത്ര കഠിന്യമേറിയ അവസ്ഥയാണെങ്കിലും അവൻ നിങ്ങളെ കാണുന്നു.

സ്നേഹത്തോടെ ശുശ്രൂഷിക്കുക

ക്രിസ്റ്റൽ ആദ്യമായി യുഎസിലെ വിർജീനിയയിലുള്ള ഒരു കോഫി ഷോപ്പിൽ ജോലി തുടങ്ങിയപ്പോൾ, അവൾ ഇബി എന്ന ഒരു വ്യക്തിക്കു സേവനം നൽകുകയുണ്ടായി. ഇബിക്ക് കേൾവിക്കുറവുള്ളതിനാൽ, തന്റെ ഫോണിൽ ടൈപ്പ് ചെയ്ത ഒരു കുറിപ്പ് ഉപയോഗിച്ചാണ് അവൻ ഓർഡർ നൽകിയിരുന്നത്. ഇബി ഷോപ്പിൽ ഒരു പതിവുകാരനാണെന്ന് മനസ്സിലാക്കിയ ശേഷം, അവന് വേണ്ടത് എഴുതിക്കാണിക്കാതെ തന്നെ ഓർഡർ നൽകാൻ ആവശ്യമായ അമേരിക്കൻ ആംഗ്യഭാഷ പഠിക്കാനും അങ്ങനെ അവനെ നന്നായി സേവിക്കാനും ക്രിസ്റ്റൽ തീരുമാനിച്ചു. 

ഇപ്രകാരം ഒരു ചെറിയ രീതിയിൽ, നാം ഏവരും പരസ്പരം നൽകണമെന്നു പത്രൊസ് പ്രേരിപ്പിച്ച സ്നേഹവും സേവനവും ക്രിസ്റ്റൽ ഇബിയോട് കാണിച്ചു. ചിതറിപ്പോയവരും പ്രവാസികളുമായ, ക്രിസ്തീയ വിശ്വാസികൾക്ക്‌എഴുതിയ ലേഖനത്തിൽ, അവർ “തമ്മിൽ ഉറ്റസ്നേഹം ഉള്ളവരായിരിപ്പിൻ” എന്നും തങ്ങളുടെ വരങ്ങൾ ഉപയോഗിച്ചു “അന്യോന്യം ശുശ്രൂഷിപ്പിൻ” എന്നും അപ്പൊസ്തലൻ സൂചിപ്പിക്കുന്നു (1 പത്രൊസ് 4:8, 10). അവൻ നമ്മിൽ സജ്ജീകരിച്ചിരിക്കുന്ന ഏത് കഴിവുകളും ശേഷികളും മറ്റുള്ളവരുടെ പ്രയോജനത്തിനായി നമുക്ക് ഉപയോഗിക്കാവുന്ന വരങ്ങളാണ്. അപ്രകാരം നാം ചെയ്യുന്നതിലൂടെ, നമ്മുടെ വാക്കുകളും പ്രവൃത്തികളും ദൈവത്തിനു മഹത്വം വരുത്തും.

താൻ ആർക്ക് എഴുതിയോ അവരെ സംബന്ധിച്ചു പത്രൊസിന്റെ വാക്കുകൾ വളരെ പ്രാധാന്യമുള്ളതായിരുന്നു, കാരണം അവർ വേദനയുടെയും ഒറ്റപ്പെടലിന്റെയും ഒരു കാലഘട്ടത്തിലൂടെ കടന്നു പോയ്ക്കൊണ്ടിരിക്കുകയായിരുന്നു. തങ്ങളുടെ പരീക്ഷകളിൽ പിടിച്ചുനിൽക്കാൻ അവരെ സഹായിക്കാനായി വൈഷമ്യത്തിന്റെ കാലത്തു പരസ്പരം ശുശ്രൂഷിക്കാൻ അവൻ അവരെ പ്രോത്സാഹിപ്പിച്ചു. മറ്റൊരാൾ അനുഭവിക്കുന്ന പ്രത്യേകമായ വേദന നമുക്കറിയില്ലെങ്കിലും, നമ്മുടെ വാക്കുകൾ, വിഭവങ്ങൾ, കഴിവുകൾ എന്നിവ ഉപയോഗിച്ച് സഹാനുഭൂതി പ്രകടിപ്പിക്കാനും കൃപയോടെയും സന്തോഷത്തോടെയും പരസ്പരം ശുശ്രൂഷിക്കാനും ദൈവത്തിനു നമ്മെ സഹായിക്കാനാകും. അവന്റെ സ്നേഹത്തിന്റെ പ്രതിഫലനമായി മറ്റുള്ളവരെ ശുശ്രൂഷിക്കാൻ ദൈവം നമ്മെ സഹായിക്കട്ടെ.